Jer 37 | NdeIBE | STEP | UZedekhiya indodana kaJosiya wabekwa nguNebhukhadinezari inkosi yaseBhabhiloni ukuba abe yinkosi yakoJuda; wabusa esikhundleni sikaJehoyakhini indodana kaJehoyakhimi.

Jeremiah 37

UJeremiya Esentolongweni

1 UZedekhiya indodana kaJosiya wabekwa nguNebhukhadinezari inkosi yaseBhabhiloni ukuba abe yinkosi yakoJuda; wabusa esikhundleni sikaJehoyakhini indodana kaJehoyakhimi.

2 Yena lezikhonzi zakhe kanye labantu baselizweni kabawanakanga amazwi kaJehova ayewakhulume ngoJeremiya umphrofethi.

3 Kodwa uZedekhiya inkosi, wathuma uJehukhali indodana kaShelemiya lomphristi uZefaniya indodana kaMahaseyiya kuJeremiya umphrofethi belaleli ilizwi, elithi, “Ake usikhulekele kuJehova uNkulunkulu.”

4 Ngalesisikhathi uJeremiya wayesekhululekile ukuza lokuhamba phakathi kwabantu, ngoba wayengakafakwa entolongweni. 5 Ibutho likaFaro laseliphumile eGibhithe, kwasekusithi amaKhaledi ayevimbezele iJerusalema esezwe umbiko ngalo, asuka eJerusalema.

6 Kwasekufika ilizwi likaJehova kuJeremiya umphrofethi lisithi: 7 “UJehova uNkulunkulu ka-Israyeli uthi: Tshelani inkosi yakoJuda elithume ukuba lizengibuza lithi, “Ibutho likaFaro eseliphume ukuba lizelisekela, lizabuyela elizweni lalo eGibhithe. 8 Emva kwalokho amaKhaledi azaphenduka ahlasele idolobho leli; azalithumba alitshise ngomlilo.’

9 “UJehova uthi: Lingazikhohlisi licabange lithi, ‘AmaKhaledi azasuka kithi impela.’ Kawayikusuka! 10 Lanxa linganqoba lonke ibutho lamaKhaledi alihlaselayo, kusale abantu abalimeleyo kuphela emathenteni abo, bazaphuma balitshise idolobho leli ngomlilo.”

11 Kwathi ibutho lamaKhaledi selisukile eJerusalema ngenxa yebutho likaFaro,

12 uJeremiya wasuka edolobheni ukuba aye elizweni lakoBhenjamini ukuba ayethatha isabelo sakhe selifa phakathi kwabantu khonale. 13 Kodwa kwathi esefikile eSangweni lakoBhenjamini, induna yabalindi ebizo layo lalingu-Irija indodana kaShelemiya, indodana kaHananiya, wambopha wasesithi kuye, “Ubalekela kumaKhaledi wena!”

14 UJeremiya wathi, “Akusiqiniso lokho! Kangibalekeli kumaKhaledi.” Kodwa u-Irija kamlalelanga; esikhundleni salokho, wabopha uJeremiya wamusa ezikhulwini. 15 Izikhulu zamthukuthelela uJeremiya zalaya ukuba atshaywe aphinde avalelwe endlini kaJonathani umabhalani, ezaseziyenze yaba yintolongo.

16 UJeremiya wafakwa esitokisini esiyingubhe emgodini oyintolongo lapho ahlala khona okwesikhathi eside. 17 Inkosi uZedekhiya wathi kayethathwa alethwe esigodlweni lapho ambuzela khona ensitha esithi, “Kulelizwi elivela kuJehova na?” UJeremiya waphendula wathi, “Ye, wena uzanikelwa enkosini yaseBhabhiloni.”

18 UJeremiya wabuye wathi kuZedekhiya inkosi, “Ngoneni kuwe loba ezikhulwini zakho kumbe kulababantu, uze ungifake entolongweni nje? 19 Bangaphi abaphrofethi bakho abaphrofetha kuwe besithi, ‘Inkosi yaseBhabhiloni kayiyikukuhlasela wena – lelizwe leli’? 20 Kodwa khathesi, nkosi yami, ake ulalele. Ngivumela ngethule isicelo sami kuwe: Ungangibuyiseli endlini kaJonathani umabhalani, hlezi ngifele khona.”

21 UZedekhiya inkosi waselaya ukuba uJeremiya afakwe egumeni labalindi aphiwe isinkwa esivela emgwaqweni wabapheki bezinkwa usuku ngalunye izinkwa zonke zize ziphele edolobheni. Ngakho uJeremiya wahlala egumeni labalindi.